Ons is in Suid Afrika baie geseënd met baie talentvolle mense. Hulle laat eintlik die ‘Guinness Book of Records’ na ‘n feëverhaal lyk.
Die eerste groepie mense is ons gedugte kar wagte in Suid Afrika. Terwyl hulle karre oppas by ‘n Mall in Bloemfontein, kan hulle ‘n Tesla in Texas hoor ‘start’. Ons almal het al daardie ervaring gehad. Jy kom rustig uitgestap met jou pakkies oppad na jou voertuig toe. En jy kan maar jou tyd vat om alles weg te pak. Dalk nog daardie skelm sjokolade eers eet voor jy ry. En jy kan maar jou tru-spieëltjies dophou so veel as jy wil, hulle sal leeg wees.
As jy daai sleutel draai, en in jou spieëltjie kyk, dan groet daar ‘n songebrande glimlag met oë wat diep in jou siel inkyk, met ‘n handjie wat saggies vir jou fluister ‘Kom, Kom, Kom’. Jy skrik eintlik, want ‘n sekonde gelede was daar niemand gewees nie. Jou hande vroetel vir kleingeld terwyl jy stadig agteruit ry. Vir ‘n onverklaarbare rede is jy nogal gehoorsaam aan die mens. Eers as jy weg ry haal jy weer asem en wonder weer “waar kom die mens vandaan.” Neem in ag daar is niks vinniger as ‘n jag luiperd op 200m nie, met gehoor beter as die van ‘n kat nie en met beter sig as ‘n arend nie, behalwe ‘n kar wag in Suid Afrika.
En dan is daar die reuk sintuig van ‘n ‘speed cop’. As jou lisensies op datum is en jou voertuig op die pad is, dan los daai mense jou uit. Laat daar nou een ding fout wees, bietjie te haastig, of die sitplek gordel is nie vas nie, dan skop hulle reuk sintuig in. Daardie mense ruik ‘n R200 noot uit jou beursie uit nog voor jy by die ATM was.
Jy kan in jou oprit sit en oefen om jou sitplek gordel op spoed vas te maak. Jy kan dit professioneel doen, en in ‘n breukdeel van ‘n sekonde, maar glo my as jy om die draai kom en daai oorgewig, honger reflektor baadjie staan daar, dan beweeg daai sitplek gordel nêrens heen nie. Dit is eers dan wanneer jy uitvind hoe effektief dit sal wees in ‘n ongeluk, as jy hom maar net aangehad het.
Kom ons wees ook eerlik met mekaar. Ons soek die kar wag in die parkeer area. Dit is asof ons bietjie veiliger voel en gemakliker in en uit ry. Die verkeersmanne het almal maar gemengde gevoelens oor. Soos enige ander professie in Suid Afrika is daar die goeie en die slegtes.
Lekker parkeer en veilig ry.
Groete.
